loftslagsmál.

Herra forseti. Ég og þingflokkur Samfylkingarinnar styðjum auðvitað frumvarpið og fögnum þessu markmiði en áréttum að nauðsynlegt er að í framhaldinu verði tölulegum markmiðum um skýrari aðgerðaáætlun stjórnvalda komið inn. Einnig þarf að koma markmiðsákvæði um kolefnishlutleysi 2040 í lög um loftslagsmál. Slíkt markmiðsákvæði ætti að vera komið fyrir árið 2030 sem varði síðan leiðina að kolefnishlutleysi og þannig tryggt að þessu markmiði verði náð. Á vegferðinni að kolefnishlutleysi þarf leiðarstefið að vera að byggt sé á hugmyndum um sanngjörn umskipti og tryggt að þær breytingar sem verða á samfélaginu leiði ekki til þess að heildaráhrifin komi ójafnt niður á fólki eftir því hvar á landinu það býr.