fjárlög 2022.
Já, takk fyrir þetta. Ég tek bara heils hugar undir. Ég held að það sé mjög mikilvægt að við gerum okkur grein fyrir upphæðunum sem fylgja þessum vítahring. Það er í rauninni hægt að fara í einfalda umslagsútreikninga á þessu. Það er að skoða hversu miklu ríkið eyðir aukalega vegna launahækkana, vegna verðbólguaukningar og verðlagsbóta og taka svo hlutfallslega það sem fasteignaverðshækkanir eru í verðbólgu í dag. Það er bein leið til að reikna þetta. En ég held að það sé góð hugmynd að við beitum okkur fyrir því í fjárlaganefnd að fá frekari útreikninga á þessu vegna þess að þetta er gríðarlega kostnaðarsamt, líka fyrir ríkið. Það gleymist oft í þessari umræðu að þetta er peningur sem lendir líka á skattborgurum og endar svo aftur á þeim í gegnum verðbólguna.