loftslagsmál.

Virðulegi forseti. Ég þakka frummælanda fyrir þessa umræðu sem mikilvægt er að við tökum reglulega hér í þingsal. Eins og fram kom í máli hæstv. ráðherra er sjálfstætt markmið um 55% samdrátt í losun gróðurhúsalofttegunda sett fram í stjórnarsáttmála nýrrar ríkisstjórnar og í vor lögfestum við hér markmið um kolefnishlutleysi Íslands árið 2040. Nú stendur þess vegna yfir vinna við að uppfæra og aðlaga aðgerðaáætlun í loftslagsmálum að þessum markmiðum.

Ég vil leggja áherslu á samráð og samvinnu við að kortleggja verkefnið og leiðir að markmiðunum. Við höfum raunveruleg tækifæri til að ná þessum markmiðum í samvinnu stjórnvalda og atvinnulífs, samvinnu ólíkra atvinnugreina, samvinnu atvinnulífs og háskóla um nýsköpun, samvinnu heimila og atvinnulífs og þannig mætti áfram telja. Það er mikill metnaður í samfélaginu sem getur skilað okkur langt. Þar er atvinnulífið í lykilhlutverki í samspili við þá umgjörð og hvata sem stjórnvöld setja.

Hv. þm. Halla Signý Kristjánsdóttir og fleiri hafa farið hér yfir mikilvægi orkuöflunar og dreifingar í þessu samhengi. En atvinnulífið er á tánum að svo mörgu öðru leyti því að vinna í loftslagsmálum er liður í góðum rekstri. Útgerðin er á fullu við að draga úr útblæstri og hefur sett sér markmið um að gera enn betur. Stór fyrirtæki vinna með skógarbændum að bindingu kolefnis. Þróun svokallaðra óvirkra rafskauta getur leitt til stökkbreytinga við að draga úr losun kolefnis frá álverum. Öll ræktun bindur kolefni í gróðri og til að ná sem bestum árangri á því sviði er mikilvægt að bændur geti nýtt þekkingu sína til kolefnisbindingar í landi og við ræktun orkujurta. (Forseti hringir.) Viðarnytjar skapa möguleika til að stuðla að sjálfbærni einstakra byggða og svo mætti áfram telja.