hollustuhættir og mengunarvarnir o.fl.
Virðulegur forseti. Ég tek eftir því að stjórnarliðum fannst þetta afskaplega sárt og ruku hér úr salnum, þessar örfáu hræður sem létu sjá sig eftir að við vöktum athygli á því að þau væru ekki hér til að eiga samtal við okkur. Mér finnst merkilegt, forseti, þegar við óskum eftir því að hlé verði gert á þingfundi, að áfram skuli haldið. Við óskum eftir því að fá rannsóknarnefnd og hingað koma stjórnarliðar hver á fætur öðrum til að hrútskýra fyrir okkur: Jú, þið megið fá rannsóknarnefnd en bara ef okkur finnst að ekki sé nóg að gert þegar Ríkisendurskoðun verður búin að skoða þetta. Þá skulum við styðja það — ef, ef, ef niðurstaðan er þannig að okkur finnst tilefni til að styðja það. Þetta er auðvitað bara heimsins mesta met í því að koma með útúrsnúninga, tafaleiki, leiðir til að velta boltanum á undan sér og tryggja að engin raunveruleg rannsókn verði gerð á því sem þarna fór fram.
Ég legg til, og geri það að tillögu minni, að hér verði enginn þingfundarfriður fyrr en gert hefur verið hlé á þessum fundi og fundið hefur verið út úr því hvernig við ætlum að hrinda af stað rannsóknarnefnd Alþingis.
