hollustuhættir og mengunarvarnir o.fl.
Virðulegur forseti. Ég vil koma hér og lýsa ánægju minni með að það sé að nást samkomulag um fund sem er búið að vera að óska eftir í allan dag. En mér þykir það skjóta skökku við að lýðræðislega kjörnir fulltrúar, sem við erum öll, skuli ekki hafa annað uppi í erminni en að djöflast hér í pontu í fundarstjórn til að fá fram einhverjar upplýsingar og einhverjar rannsóknir sem við teljum að þurfi að fara fram. Þetta er auðvitað bara algert gerræði. Við getum óskað eftir því í fjárlaganefnd; ef þrír leggja fram einhverja beiðni þá fer það í gang. En hér gerist bara ekki neitt af því að meiri hlutinn stjórnar því hvað á að skoða og um hvað á að ræða. Það er náttúrlega bara mjög sérstakt að reglur þingsins skuli vera með þessum hætti. Við eigum, þótt í stjórnarandstöðu séum, að hafa fullan rétt á því að óska eftir öllum þeim rannsóknum og öllum þeim upplýsingum sem við teljum að við þurfum að hafa til að geta tekið ákvarðanir í framhaldinu. (Gripið fram í: Heyr, heyr.)