heildarúttekt heilbrigðisþjónustu við einstaklinga með vímuefnasjúkdóma.
Frú forseti. Ég kem hér upp til að þakka fyrir þessa umræðu sem hér fer fram og taka undir með þeim sem hafa sagt að við þurfum stefnumótun, heildræna stefnumótun í þessum málaflokki og það þarf að vera algjörlega skýrt hvert stjórnvöld ætla að stefna í vímuefnavörnum og hvernig vímuefnameðferð á að vera á Íslandi. Af því tilefni vil ég nota þetta tækifæri og ítreka nauðsyn þess að tekið sé tillit til ólíkra þarfa ólíkra hópa. Konur og karlar hafa ekki sömu þarfir í meðferð, jaðarsettir hópar enn aðrar. Við vitum að það hefur verið bent á þetta árum saman. Í áratug hefur Rótin bent á þarfir kvenna vegna vímuefnavanda og þær eru oft allt aðrar en annarra. Við verðum að styðjast við nýjustu aðferðir, gagnreyndar upplýsingar og rannsóknir og við verðum líka að horfast í augu við það að fleira dugar en 12 spora kerfið.