störf þingsins.
Frú forseti. Við búum í samfélagi sem er mótað af aldalangri hefð í menntun og menningu sem á rót sína að rekja til kristilegra viðhorfa til einstaklingsins og samfélagsins. Það er mikilvægt að þessi viðhorf fái að heyrast á Alþingi. Við sem þjóð stöndum á sögulegum og menningarlegum grunni kristinnar trúar og gilda. Íslenskt samfélag og kristinn siður og gildi eiga enn sem áður samleið. Í ráðgefandi þjóðaratkvæðagreiðslu í október 2012 vildi meiri hluti þjóðarinnar, eða 51%, ákvæði um þjóðkirkju í stjórnarskrá. Stjórnvöldum ber skylda til að styðja og vernda þjóðkirkjuna. Um það er kveðið á í stjórnarskránni. Ég vil nota hér tækifærið og þakka forsætisráðherra sérstaklega fyrir hennar stuðning við þjóðkirkjuna í orði og verki. Undir forystu forsætisráðherra hefur verið endurnýjað kirkjujarðasamkomulag ríkis og kirkju sem reynst hefur kirkjunni traustur bakhjarl og hefur gegnt lykilhlutverki í að skapa henni fjárhagslegt sjálfstæði og öryggi.
Frú forseti. Það er ákaflega dapurlegt og í raun sorglegt að sjá hvernig forsætisráðherra hefur upp á síðkastið mátt sitja undir rætinni illmælgi af hálfu sóknarprests vegna ákvarðana yfirvalda í útlendingamálum. Það er einsdæmi að vígður þjónn þjóðkirkjunnar skuli vega svo ómaklega að forsætisráðherra Íslands. Umræddur þjóðkirkjuprestur, sem fengið hefur ávítur frá biskupi Íslands, mætti eins og aðrir sem láta sig þennan málaflokk varða íhuga að málsmeðferð er bundin í lögum, samþykktum af Alþingi. Íslenskir ráðamenn, þar á meðal ráðherrar ríkisstjórnarinnar, hafa enga heimild að lögum til að víkja frá niðurstöðum sjálfstæðra stofnana sem unnið hafa úr málum samkvæmt þeim kröfum sem til þeirra eru gerðar um réttláta málsmeðferð og réttaröryggi. Við búum við lögmæta skipan mála. (Forseti hringir.) Ísland er réttarríki en ekki ríki geðþóttavalds og lögleysu.