skýrsla Ríkisendurskoðunar um geðheilbrigðisþjónustu.
Virðulegi forseti. Ég held að allir geti tekið undir það að það vantaði fjármagn inn í rekstur geðheilbrigðiskerfis okkar Íslendinga og ríkisstjórnin hefur á síðasta kjörtímabili sett umtalsvert fjármagn til viðbótar í það. Ég nefndi í upphafi máls míns áðan dæmi um aukið fjármagn sem kom til og hefur nýst vel í mínu kjördæmi með stofnun sérstaks geðheilbrigðisteymis. Ekki er hægt að setja svoleiðis teymi upp öðruvísi en að auka fjármagn eins og gert var. Það liggur í hlutarins eðli að ef á að fara að fjölga starfsfólki og fjölga sérfræðingum þá þarf fjármagn að koma til. En fjármálaráðherra hefur einnig margoft tekið fram að það er gríðarlegt magn af fjármunum inni í kerfinu og við þurfum líka að fara vel með það fé sem þar er.