Störf þingsins.
Virðulegur forseti. Margar ákvarðanir Alþingis eða stofnana samfélagsins virðast ekki alltaf hugsaðar til enda. Lög og reglur eru settar án þess að hirt sé um hvaða afleiðingar það hafi á þá sem starfa undir götóttum reglugerðarhimni þeirra sem ekki sjá málin í samhengi hlutanna. Frá og með næstu áramótum verður bannað að urða lífrænan úrgang og dýrahræ. Þá verður ekki hægt að fara með dýrahræ til förgunar, til að mynda í starfsstöð Sorpurðunar Vesturlands í Fíflholti. Frá næstu áramótum þurfa sveitarfélögin því að huga að nýju kerfi við að fjarlægja dýraleifar og koma þeim í förgun.
Þarna vandast málin. Í dag er það einungis móttöku- og brennslustöðin Kalka í Helguvík á Reykjanesi sem getur tekið á móti hræjum til brennslu. Kalka er ekki í alfaraleið fyrir bændur sem þurfa að koma dýrahræjum í brennslu og búa allt í kringum landið. Ef við tökum sem dæmi eru akstursleiðir frá Búðardal í Fíflholt um 80 km leið, frá Búðardal í Kölku eru um 220 km og 650 km eru austur á Hérað, sem gefur vísbendingu um kostnaðarhækkun ef brenna þarf dýrahræ fyrir allt landið í Kölku. Það lítur út fyrir að vinstri höndin viti ekki hvað sú hægri gerir í loftslagsmálum þegar lengja þarf akstursleiðir bifreiða, sem drifnir eru áfram af jarðefnaeldsneyti, um allt að 140–600 km í hverri ferð, aðra leiðina, en ferðirnar skipta hundruðum á ári.
Nú virðast engar lausnir í sjónmáli og skammur tími er til stefnu. Á höfuðborgarsvæðinu einu saman falla til 7.000 tonn á ári af lífrænum úrgangi sem lítt hefur verið hugað að hvernig megi farga. Það þarf því að kanna allar mögulegar lausnir áður en farið er út í kostnaðarauka fyrir bændur og þá sem eiga hesta og dýr í útigöngu.
Virðulegur forseti. Munu bændur þurfa að búa við þjónustuskerðingu vegna þess að málin eru ekki hugsuð til enda og örugg förgun dýrahræja ekki í boði? Eru sveitarfélögin og við, sem berum ábyrgð á lögum og reglugerðum um þessi mál, með lausnir sem taka tillit til kostnaðar við förgun og minni losun gróðurhúsalofttegunda við flutninginn?