störf þingsins.
Virðulegi forseti. Mig langar að tala um orkuþörf framtíðarinnar og forsendur hennar. Sumir eru sannfærðir um að það þurfi að ganga meira á náttúruperlur Íslands til að nýta orku og telja í góðri trú að engin önnur leið sé til að ná þeirri raforku sem þarf til að innleiða orkuskipti. En mig langar að benda á að u.þ.b. 80% af þeirri raforku sem framleidd er á Íslandi í dag fara til mengandi starfsemi sem framleiðir málm og þessi starfsemi er algerlega fyrir utan hringrásarhagkerfið. Þetta er skekkja.
Nýverið sótti ég opinn fund á vegum VG þar sem Samtök iðnaðarins og Landvernd tóku þátt. Þar kom mjög skýrt fram þessi stóra skekkja sem við Íslendingar eigum ekki að sætta okkur við. Sérfræðingar segja að til þess að framleiða sama magn af málmi úr endurnýttum málmi í stað hráefnis eins og báxíts þurfi einungis 10–15% þeirrar raforku sem er notuð í dag. Á fundinum sýndi orkuskiptahermir Landverndar vel hversu mikla raforku þarf þegar stóriðja á Íslandi er færð inn í hringrásarhagkerfi, hversu gríðarlega mikið magn af raforku sem er nú þegar framleitt gæti farið í orkuskipti, í lífræna matvælaframleiðslu og ýtt undir sjálfbærni og loftslagsvænna samfélag. Með því að nýta orkuna betur og með því að færa mengandi stóriðju inn í hringrásarhagkerfið getum við verndað náttúruna, víðerni og landslag og einnig dregið stórkostlega úr losun gróðurhúsalofttegunda.
Ég tel mikilvægt að við leggjum á það áherslu og setjum í það fjármuni að rannsaka hvernig megi sem best nýta þá orku sem þegar er framleidd. Það er ávinningur okkar allra, ávinningur náttúrunnar, raforkuframleiðenda og jafnvel stórnotenda.
