fjárlög 2023.
Frú forseti. Ég vil þakka hv. þingmanni fyrir ósköp áheyrilega og innihaldsríka ræðu. Hann kom aðeins inn á heilbrigðisstofnanir vítt og breitt um landið og mikilvægi þess að tryggja rekstrargrunn þeirra. Nú sendu heilbrigðisstofnanir á landsbyggðinni fjárlaganefnd hálfgert neyðarkall um að það stefndi í samtals milljarðs halla á rekstri þeirra að frádregnum Covid-kostnaði og kölluðu eftir því að reksturinn yrði styrktur um 1.200 millj. kr. á ári til þess að þær gætu a.m.k. sinnt þeirri lögbundnu þjónustu sem til er ætlast af þeim. Og ég vil spyrja hv. þingmann: Hvernig brást stjórnarmeirihlutinn við þessari umsögn? Hvaða breytingar voru gerðar í þessum efnum á fjárheimildum sem hafa með almenna sjúkrahúsþjónustu að gera?