þjónusta við fatlað fólk með langvarandi stuðningsþarfir.

Virðulegi forseti. Ég þakka hv. þm. Ingu Sæland fyrir svarið við andsvari mínu. 533 milljarðar, það er upphæðin sem hv. þingmaður nefndi. Nú ætla ég að spyrja um NPA-samningana en kannski kem ég að því síðar í ræðu minni og hv. þingmaður getur farið í andsvar við mig. En 533 milljarðar, virðulegi forseti. Ég ætla bara að láta í smástund eins og við búum í draumaheimi og ég ætla að nefna hlutina sem við getum gert fyrir 533 milljarða. Eins og hv. þingmaður sagði gætum við hækkað lágmarksframfærslu örorkubóta upp í 400.000 kr., meira að segja upp í 500.000 kr. Við gætum gefið eldra fólki desemberuppbót, alveg eins og við erum að gefa öryrkjum desemberuppbót. Við gætum sett meira fjármagn í fangelsin og nýtt fjármagn í það að efla fangelsin og geðheilsuteymin innan fangelsanna, ekki bara að vopnavæða fangaverðina. Við gætum sett meira fjármagn til lögreglunnar og á rannsóknarsviðið, í ákæruvaldið, þannig að það taki ekki 180 daga að rannsaka eitt kynferðisbrotamál.

Virðulegur forseti. Það er hægt að gera svo mikið með 533 milljarða. Guð minn almáttugur, ég gæti verið hér í allt kvöld að nefna hvað hægt er að gera við þennan pening. En þetta er einmitt spurning um forgangsröðun alveg eins og hv. þm. Inga Sæland segir.