breyting á ýmsum lögum vegna fjárlaga 2023.

Virðulegi forseti. Mér rennur blóðið til skyldunnar að koma hér upp vegna orða hv. 8. þm. Norðvest., vegna fiskeldisgjalds. Hann talar þar um misræmi. Það stendur auðvitað það sem stendur í nefndaráliti efnahags- og viðskiptanefndar og við ræddum hér í umræðunni í gær. Þar kom fram að árið 2019 var settur sjö ára aðlögunartími fyrir þessa grein sem er í miklum fjárfestingarfasa og uppbyggingarfasa. Matvælaráðherra er með endurskoðun í gangi á greininni til framtíðar litið. Þar er hún að vinna með m.a. Boston Consulting Group og nefndin æskir þess að þeirri vinnu ljúki núna á næsta ári og þá verði þessi gjaldtaka lögð fram til framtíðar.

Svo vil ég bara fá að segja það hér að lokum: Hér hefur hagvöxtur á þriðja ársfjórðungi verið 7,7%, atvinnuleysi í október 2,8%. Það er ekkert sem bendir til að hér sé allt á vonarvöl eins og stjórnarandstaðan vill vera láta.