starfsemi stjórnmálasamtaka.

Virðulegi forseti. Ég þakka hv. þingmanni kærlega fyrir andsvarið. Virkilega ánægjulegt að eiga hér orðastað við hv. þingmann dag eftir dag. Mig langar að nefna nokkra punkta vegna þessa andsvars. Í fyrsta lagi, varðandi óhæðið, þá var tilefni þessarar lagasetningar árið 2006 m.a. tilmæli ráðherranefndar Evrópuráðsins og var sérstaklega litið til þeirra við smíði þess frumvarps. Í þeim tilmælum var lögð áhersla á að hvorki fjárstyrkur einkaaðila né hins opinbera hefði áhrif á sjálfstæði stjórnmálaflokka. Það er svolítið áhugavert í þessu samhengi.

Varðandi orð hv. þingmanns um völd og breytingarmátt þingmanna, þá langar mig til að nefna að það hafa orðið miklar breytingar á íslensku atvinnulífi undanfarna áratugi. Við höfum auðvitað leyst atvinnulífið að svo rosalega miklu leyti úr viðjum leyfisveitinga og úthlutunarkerfa. Þau kerfi buðu upp á ákveðinn freistnivanda til að þrýsta á ákveðna hagsmuni og fyrirgreiðslur. Í dag hafa stjórnmálamenn, eins og við þekkjum hér — valdalausir þingmenn — miklu minni tækifæri til að mismuna fólki og fyrirtækjum. Mér sýnist ég ekki hafa mikið lengri tíma. Ég hefði gjarnan viljað ræða frekar við hv. þingmann áhrif þessa áhugaleysis á þátttöku í stjórnmálastarfi og hvort og þá hvernig samtenging sé þarna á milli við það kerfi sem ekki bara við heldur mjög mörg lönd í kringum okkur hafa smíðað.