virðisaukaskattur o.fl.

Virðulegi forseti. Það er kannski ekki miklu við þetta að bæta en auðvitað segir það sig sjálft að það að framlengja eitthvert úrræði er breyting. Það kemur nú bara fram í greinargerð að áhrifin séu til hækkunar á húsnæðisverði. Þau áhrif væru ekki til staðar eða væru að fjara út ef ákveðið hefði verið að framlengja þetta ekki.

Annars fæ ég kannski bara að velta því upp hérna í seinna andsvari að nú hefur verið gagnrýnd þessi skattfrjálsa ráðstöfun séreignarsparnaðar á þeim forsendum að hún í rauninni leiti frekar ofarlega í tekjustigann. Fjármálaráð er nýbúið að skila áliti þar sem er kallað eftir mjög markvissum stuðningi við fólk á húsnæðismarkaði, að það sé leitað allra leiða til að tryggja að stuðningurinn sé ekki að leita mjög ofarlega upp tekju- og eignastigann. Þá fæ ég kannski bara að inna ráðherra eftir því (Forseti hringir.) hvort hann geti tekið undir það og hvort þessi framlenging sé í samræmi við það.