fjárlög 2024.

Forseti. Það er fleira sem ég skil ekki. Dálítið merkilegt, er það ekki? Hérna segir ráðherra að tekjur hafi hækkað umfram væntingar. Samt heyrðum við væntanlega öll ræðu hæstv. mennta- og barnamálaráðherra í gær. Það var mjög áhugaverð ræða. Ég klóraði mér aðeins í hausnum og þurfti aðeins að líta upp í ræðustól Alþingis og athuga hvort það væri ekki örugglega ráðherra í þessari ríkisstjórn að tala um stöðu menntamála. Ef ríkisstjórnin er að segja: Fyrirgefið, fjármálaráðherra segir að við höfum engin áhrif á fjármálaþróunina, verðbólguþróunina, en samt er ríkisstjórnin að koma með einhverjar tillögur um það hvernig eigi að hafa áhrif á hana og stærir sig af því, eru það þá ekki dálítið stolnar fjaðrir ef ríkisfjármálin hafa engin áhrif á þetta hvort eð er?

Þetta er rosalega tvískipt umræða sem er í gangi hérna. Í umræðum um stefnuræðuna í gær baunar fjármálaráðherra á hægri hluta stjórnarandstöðunnar, það sé ekki nægt aðhald, og að vinstri hluti stjórnarandstöðunnar vilji bara hækka skatta. Það er dálítil pólitísk tvískipting þarna í gangi, vissulega. En aldrei heyrum við rökin á bak við það af hverju það er góð hugmynd, sem mér fannst koma í ljós í ræðum stjórnarandstöðunnar hérna í gær, af hverju það er góð hugmynd að hafa meira aðhald á réttum stöðum, af hverju það er góð hugmynd að hækka skatta á réttum stöðum þar sem fjármagn safnast saman og myndar bólur. Þar hefur ríkisstjórnin efnahagsstjórnarhlutverki að gegna. Þess vegna skil ég ekki af hverju ríkisstjórnin beitir því ekki.