hlaðvarpsgerð Ríkisútvarpsins.
Hæstv. forseti. Já, það eru sannmæli, ég ætla að gera stutta athugasemd. Það tók mig svolítinn tíma að fatta hvað þessi hlaðvörp voru vegna þess að ég skildi aldrei muninn á þeim og útvarpsþáttum þegar þau voru að byrja nema það var hægt að nálgast þau á hvaða tíma sem var í gegnum netið. Ég held nú reyndar úti einu slíku sjálfu núna þannig að ég hef tekið þau í sátt. En hlaðvörp eru í grunninn bara dagskrárgerð og þeim er miðlað á netinu eins og raunar allri dagskrá Ríkisútvarpsins um þessar mundir og flestra fjölmiðla þannig að ég verð að viðurkenna að mér finnst þessi greinarmunur sem gerður er á hlaðvörpum annars vegar og hefðbundinni dagskrárgerð Ríkisútvarpsins hins vegar, sem það hefur sannarlega heimild fyrir í lögum og raunar skyldur til að sinna, vera skrýtinn.