Störf þingsins.

Virðulegi forseti. Til að geta boðið upp á framúrskarandi heilbrigðis-, mennta- og velferðarkerfi, öruggt samfélag fyrir borgarana og góða innviði þurfum við öfluga verðmætasköpun. Verðmætin verða til í atvinnulífinu hjá fyrirtækjum landsins. Þar er lagður grunnurinn að verðmætasköpuninni sem stuðlar að því að velferð, framþróun og hagsæld eigi sér stað svo hægt sé að standa undir þessum grunnstoðum samfélagsins.

Ástæðan fyrir að ég nefni þetta hér í dag er vegna þess að það virðist vera útbreidd skoðun hérna inni að það séu engin mörk fyrir því hversu háa skatta telst eðlilegt að leggja á atvinnulífið. Áherslan er á vannýtta tekjustofna ríkisins í staðinn fyrir vannýtt tækifæri atvinnulífsins. Við verðum að búa svo um hnútana að atvinnulífið geti sótt fram á grunni nýrra tækifæra. Verkefnið okkar á hverjum einasta degi ætti að snúast um það hvernig við eflum samkeppnishæfni íslensks atvinnulífs. Samkeppnishæfnin ræðst nefnilega að miklu leyti af þeirri umgjörð sem stjórnvöld skapa. Samkeppnishæfni byggir m.a. á menntun, innviðum, starfsumhverfi, nýsköpun, orku og umhverfi.

Niðurstöður könnunar íslensks iðnaðar benda til þess að regluverk og eftirlit sé íþyngjandi, flókið, óskilvirkt og kostnaðarsamt. Í dag starfa yfir 50.000 manns við íslenskan iðnað og stendur iðnaðurinn á Íslandi undir um fjórðungi af landsframleiðslu og skapar 44% útflutningstekna. Við þurfum að vinna að því að einfalda regluverk, gera það skilvirkt og draga úr kostnaði, lækka skatta og gjöld. Slíkar umbætur auka samkeppnishæfni fyrirtækja og auka þar með verðmætasköpun í íslensku samfélagi sem gerir það að verkum að við getum staðið undir þeim stóru áskorunum sem við okkur blasa og stuðlað að betri lífskjörum fyrir okkur öll.