Heimsókn framkvæmdastjóra jafnréttismála hjá ESB
Helena Dalli, framkvæmdastjóri jafnréttismála hjá Evrópusambandinu, heimsótti Alþingi í dag. Átti hún annars vegar fund með Birgi Ármannssyni, forseta Alþingis, og hins vegar með fulltrúum úr allsherjar- og menntamálanefnd.
Á fundunum var fjallað um stöðu jafnréttismála á Íslandi, m.a. réttindi hinsegin fólks, löggjöf um jafnlaunastaðal, fyrirkomulag fæðingarorlofs og leikskólakerfi. Þá var fjallað um starfsvið framkvæmdastjóra jafnréttismála ESB, þ.á m. stefnumótun og aðgerðaáætlanir til þess að vinna gegn kynþáttahyggju og mismunun á grundvelli kyns, kynhneigðar, fötlunar, aldurs o.s.frv.
Helena Dalli, framkvæmdastjóri jafnréttismála hjá Evrópusambandinu, skrifar í gestabók Alþingis. Hjá henni stendur Birgir Ármannsson, forseti Alþingis.