Lagasafn. Íslensk lög 12. apríl 2024. Útgáfa 154b. Prenta í tveimur dálkum.
Lög um vinnustaðanámssjóð
2012 nr. 71 26. júní
Ferill málsins á Alþingi.
Frumvarp til laga.
Tóku gildi 4. júlí 2012.
Ef í lögum þessum er getið um ráðherra eða ráðuneyti án þess að málefnasvið sé tilgreint sérstaklega eða til þess vísað, er átt við
mennta- og barnamálaráðherra eða
mennta- og barnamálaráðuneyti sem fer með lög þessi. Upplýsingar um málefnasvið ráðuneyta skv. forsetaúrskurði er að finna
hér.
1. gr.
Gildissvið og yfirstjórn.
![](/lagas/hk.jpg)
Vinnustaðanámssjóður veitir styrki til fyrirtækja og stofnana vegna vinnustaðanáms og starfsþjálfunar sem er skilgreindur hluti af starfsnámi samkvæmt aðalnámskrá framhaldsskóla.
![](/lagas/hk.jpg)
Um vinnustaðanám fer eftir ákvæðum laga um framhaldsskóla.
![](/lagas/hk.jpg)
Ráðherra fer með yfirstjórn vinnustaðanámssjóðs.
2. gr.
Hlutverk vinnustaðanámssjóðs.
![](/lagas/hk.jpg)
Hlutverk vinnustaðanámssjóðs er að bæta stöðu starfsmenntunar og stuðla að eflingu vinnustaðanáms með því að:
a. auðvelda nemendum að ljúka tilskildu námi samkvæmt aðalnámskrá framhaldsskóla,
b. koma til móts við kostnað fyrirtækja og stofnana af vinnustaðanámi og
c. auðvelda fyrirtækjum og stofnunum að taka nemendur á náms- eða starfsþjálfunarsamning.
3. gr.
Stjórn vinnustaðanámssjóðs.
![](/lagas/hk.jpg)
Ráðherra skipar níu aðalmenn og níu til vara í stjórn vinnustaðanámssjóðs til fjögurra ára í senn. Alþýðusamband Íslands, Samtök atvinnulífsins, Samband íslenskra sveitarfélaga, Bandalag starfsmanna ríkis og bæja, Félag íslenskra framhaldsskóla, Samband íslenskra framhaldsskólanema, Kennarasamband Íslands og fjármálaráðuneyti tilnefna einn aðalmann og einn varamann í stjórn sjóðsins. Formaður og varamaður hans eru skipaðir án tilnefningar.
![](/lagas/hk.jpg)
Ekki er heimilt að skipa sama mann aðalmann í stjórn vinnustaðanámssjóðs lengur en tvö samfelld tímabil.
4. gr.
Úthlutanir úr vinnustaðanámssjóði.
![](/lagas/hk.jpg)
Stjórn vinnustaðanámssjóðs tekur ákvörðun um veitingu styrkja og er grundvöllur fyrir styrkveitingu að fyrir liggi samningur milli nemanda, framhaldsskóla og fyrirtækis eða stofnunar um vinnustaðanám og starfsþjálfun á vinnustað samkvæmt ákvæðum reglugerðar um vinnustaðanám og starfsþjálfun á vinnustað. Við mat á umsóknum er stjórninni heimilt að leita umsagnar fagaðila.
![](/lagas/hk.jpg)
Ákvarðanir um úthlutun úr vinnustaðanámssjóði verða ekki kærðar til æðra stjórnvalds.
![](/lagas/hk.jpg)
Stjórn vinnustaðanámssjóðs skal birta opinberlega yfirlit yfir styrkveitingar sínar.
![](/lagas/hk.jpg)
Ráðherra setur úthlutunarreglur fyrir vinnustaðanámssjóð að fengnum tillögum stjórnar sjóðsins.
![](/lagas/hk.jpg)
Ráðherra er heimilt að semja við þar til bæran aðila um að annast umsýslu sjóðsins.
5. gr.
Tekjustofnar vinnustaðanámssjóðs.
![](/lagas/hk.jpg)
Framlög í vinnustaðanámssjóð eru ákveðin af Alþingi í fjárlögum hvers árs.
6. gr.
Mat og eftirlit.
![](/lagas/hk.jpg)
Stjórn vinnustaðanámssjóðs hefur eftirlit með nýtingu fjármuna sjóðsins og getur kallað eftir upplýsingum frá umsýsluaðila um meðferð og nýtingu fjárins verði nýtt heimild í 5. mgr. 4. gr. til að fela þar til bærum aðila umsýslu sjóðsins. Stjórnin skilar árlega skýrslu til ráðherra.
7. gr.
![](/lagas/hk.jpg)
Lög þessi taka þegar gildi.