Lagasafn. Íslensk lög 12. apríl 2024. Útgáfa 154b. Prenta í tveimur dálkum.
Lög um ófrjósemisaðgerðir
2019 nr. 35 15. maí
Ferill málsins á Alþingi.
Frumvarp til laga.
Tóku gildi 24. maí 2019. Breytt með: L. 153/2020 (tóku gildi 6. jan. 2021).
1. gr.
Markmið og gildissvið.
![](/lagas/hk.jpg)
Markmið laga þessara er að tryggja einstaklingum sjálfsforræði til að taka ákvörðun um ófrjósemisaðgerð. Gæta skal mannréttinda og mannhelgi í hvívetna við framkvæmd laganna.
![](/lagas/hk.jpg)
Ákvæði laga þessara taka ekki til tilvika þar sem um nauðsynlega læknismeðferð er að ræða enda þótt ófrjósemi hljótist af.
2. gr.
Ófrjósemisaðgerð.
![](/lagas/hk.jpg)
Ófrjósemisaðgerð samkvæmt lögum þessum er þegar sáðgöngum …
1) eða eggjaleiðurum …
1) er lokað til að binda enda á frjósemi.
1)L. 153/2020, 18. gr.
3. gr.
Heimild til ófrjósemisaðgerðar.
![](/lagas/hk.jpg)
Ófrjósemisaðgerð er heimil að ósk einstaklings sem náð hefur 18 ára aldri.
![](/lagas/hk.jpg)
Einungis er heimilt að framkvæma ófrjósemisaðgerð á einstaklingum sem eru ólögráða fyrir æsku sakir þegar ætla má að frjósemi viðkomandi hafi alvarleg áhrif á líf eða heilsu einstaklingsins og skal liggja fyrir staðfesting tveggja lækna um slíkt, auk samþykkis sérstaklega skipaðs lögráðamanns, sbr. 53. gr. lögræðislaga.
4. gr.
Fræðsla.
![](/lagas/hk.jpg)
Áður en ófrjósemisaðgerð er framkvæmd skal fræða viðkomandi um í hverju aðgerðin er fólgin, áhættu samfara henni sem og afleiðingar.
5. gr.
Framkvæmd ófrjósemisaðgerðar.
![](/lagas/hk.jpg)
Einungis læknar með sérfræðiviðurkenningu í almennum skurðlækningum, kvensjúkdómalækningum eða þvagfæraskurðlækningum mega framkvæma ófrjósemisaðgerð í samræmi við ákvæði laga þessara, laga um heilbrigðisþjónustu, laga um réttindi sjúklinga, laga um sjúkraskrár og annarra laga eftir því sem við á.
![](/lagas/hk.jpg)
Ófrjósemisaðgerð skal framkvæmd á heilbrigðisstofnun eða starfsstofu læknis, sbr. 1. mgr., sem landlæknir hefur eftirlit með, sbr. lög um landlækni og lýðheilsu.
6. gr.
Synjun um ófrjósemisaðgerð.
![](/lagas/hk.jpg)
Heimilt er að bera synjun um framkvæmd ófrjósemisaðgerðar undir landlækni og er ákvörðun landlæknis endanleg á stjórnsýslustigi.
7. gr.
Gjaldtaka.
![](/lagas/hk.jpg)
Ófrjósemisaðgerðir skulu vera gjaldfrjálsar fyrir einstaklinga sem eru sjúkratryggðir samkvæmt lögum um sjúkratryggingar.
8. gr.
Viðurlög.
![](/lagas/hk.jpg)
Um brot gegn ákvæðum laga þessara fer samkvæmt almennum hegningarlögum og lögum um heilbrigðisstarfsmenn, eftir því sem við á.
9. gr.
Gildistaka.
![](/lagas/hk.jpg)
Lög þessi öðlast þegar gildi.
10. gr.
Breyting á öðrum lögum. …