Helgidagafriður.
Ögmundur Jónasson (Vg) (andsvar):
Hæstv. forseti. Það er mjög þægilegt að geta farið út í búð allan sólarhringinn, á kvöldin, nóttunni, föstudaginn langa og þess vegna á jólunum til að kaupa ost, mjólk, Ora-fiskibollur og það sem hefur gleymst að kaupa. En það er önnur hlið á málinu. Það eru hagsmunir og óskir þess fólks sem starfar í verslunum. Ég vil spyrja hv. framsögumann, hv. þm. Bjarna Benediktsson, nánar um afstöðu samtaka verslunarfólks. Ég heyrði ekki betur í fréttum en samtök verslunarmanna væru algerlega andvíg breytingunum og ég óska eftir því að hann upplýsi þingið um afstöðu starfsfólksins í verslunum.