íslensk málstefna.

Forseti. Þingmenn greiða nú atkvæði um opinbera íslenska málstefnu. Þetta er í fyrsta sinn í sögu þjóðarinnar sem slík stefna er mótuð. Að baki henni liggur mikil vinna, bæði undanfarið ár og svo auðvitað aldir aftur í íslenska sögu.

Mér er það sérstakur heiður sem framsögumanni menntamálanefndar um málið að þakka nefndarmönnum góða vinnu og mikinn áhuga við umfjöllun um þetta mál og ég þakka líka einlæglega flutningsmanni tillögunnar, hv. þm. og hæstv. fyrrverandi menntamálaráðherra, Þorgerði Katrínu Gunnarsdóttur fyrir sinn hlut og treysti því að núverandi menntamálaráðherra vinni áfram á þessum grunni, hæstv. ráðherra Katrín Jakobsdóttir.

Það er trú mín, forseti, að með samþykkt þessarar tillögu á eftir stigi þing og þjóð gæfuskref. Alþingi hefur sett ofan að undanförnu og þess vegna ber að fagna því sérstaklega að nú virðast allir þingmenn einhuga um að halda uppi heiðri og virðingu íslensks máls og menningar.