aðgerðir til að bregðast við fjárhagsvanda íslenskra heimila og atvinnulífs.
Hæstv. forseti. Ég þakka hv. þingmanni fyrir að koma með andsvar.
Nei, ég tel ekki efni til þess að koma með vantraust á ríkisstjórnina. Við framsóknarmenn höfum heitið því að verja ríkisstjórnina vantrausti og við stöndum við það sem við segjum. (PHB: Þó að hún standi ekki við sitt?)
Hins vegar höfum við allan rétt til þess að gagnrýna ríkisstjórnina eins og okkur sýnist þurfa. Það sem kom fram í máli mínu var að ég tel að því miður hafi ríkisstjórnin ekki, a.m.k. enn þá, ráðist í nægjanlegar aðgerðir til þess að taka á vandanum. Ég tók líka fram í ræðu minni að vissulega væri búið að gera ýmislegt í sjálfu sér. Við vitum að ýmislegt er búið að gera, en okkur þykir ekki nóg að gert. Við lögðum mikla áherslu á það þegar ríkisstjórnin var mynduð, og við komum að því með því að heita stuðningi eða verja vantrausti, að ráðist yrði í aðgerðir, alvöruaðgerðir, í þágu heimila og fyrirtækja. Við förum ekkert ofan af því. Það hefur ekkert breyst og við köllum einfaldlega eftir því að ráðist verði í frekari aðgerðir en þegar hefur verið gert. Það er það sem ég á við, hv. þingmaður.