reynsla af breyttu skipulagi heilbrigðisþjónustu utan höfuðborgarsvæðisins.

Virðulegi forseti. Ég þakka enn og aftur fyrirspyrjandanum fyrir spurningarnar og hv. þm. Guðjóni Brjánssyni fyrir sínar viðbætur. Ég held að við getum sagt: Núna erum við að mörgu leyti á svona viðbótarlærdómsskeiði sem er þessi faraldur sem íslenska heilbrigðiskerfið er að glíma við. Eins og alltaf er með áföll eins og íslenskt samfélag horfist í augu við nú um stundir koma í ljós mestu styrkleikar kerfanna okkar og líka mestu veikleikar þeirra, þannig að við sjáum dálítið hratt inn í rótina á því sem við erum með í samfélaginu. Það er margt við viðbragð íslenskrar heilbrigðisþjónustu sem gefur okkur tilefni til að vera afar stolt af heilbrigðiskerfinu okkar. Það er í grunninn opinbert heilbrigðiskerfi, það er leiðin sem við höfum valið að fara á Íslandi. Það er farsæl leið. Það er leiðin sem snýst um að vera með samhæft og öflugt opinbert heilbrigðiskerfi þar sem þættirnir spila saman og fólk talar saman.

Ég hef á mínum tíma komið á föstu samráði við alla forstjóra heilbrigðisstofnananna sem skiptir mjög miklu máli í þessu og hefur komið sér mjög vel í gegnum Covid-19 faraldurinn. Þar hafa þessir forstjórar stutt hver annan og staðið saman í gegnum þessar áskoranir.

Hv. þm. Guðjón Brjánsson veltir sérstaklega fyrir sér þessu með hvatana sem hafa vissulega verið reyndir á höfuðborgarsvæðið og gefist vel að flestu leyti en þetta er ekki endanlegt fyrirkomulag. Við erum að skuggakeyra, eins og það heitir núna, greiðslumódel fyrir heilsugæsluna á landsbyggðinni. Við erum að því nú á árinu 2020 í því skyni að sjá með hvaða hætti við þurfum að aðlaga kerfið að ólíkum aðstæðum í hinum dreifðu byggðum og því sem er hér á höfuðborgarsvæðinu og ég vænti þess að það komi gott kerfi út úr því, þannig að það er á plani.

Ég tek svo undir það sem hv. þingmaður nefndi með fjarheilbrigðisþjónustu, bráðaþjónustu (Forseti hringir.) og sjúkraflutninga. Þjónustukortið er á borði sveitarstjórnarráðherra, ég hef séð það í drögum.