störf þingsins.

Virðulegi forseti. Markmiðið með skattkerfinu okkar er að afla ríkissjóði tekna til að standa undir rekstri, greiða niður skuldir og fleira en einnig að stuðla að jöfnuði í samfélaginu. Þrepaskipt skattkerfi eins og við búum við og komið var á af núverandi ríkisstjórn er vel til þess fallið að ná þeim markmiðum. Þar er byrðunum dreift þannig að þeir greiða hlutfallslega meira í sameiginlega sjóði sem meira hafa úr að spila en þess gætt að þeir sem verr standa greiði hlutfallslega minna. Greiningar hafa sýnt að niðurstaðan er eins og að var stefnt: 60% heimila í landinu greiða hlutfallslega lægri skatta nú en þeir gerðu fyrir skattkerfisbreytinguna. Við öflum tekna fyrir ríkissjóð og aukum jöfnuð í samfélaginu um leið.

Eitt af fjölmörgum kosningaloforðum sjálfstæðismanna er að lækka tekjuskatt einstaklinga og hann verði jafnframt í einu þrepi. En hvað þýðir þetta fyrir heimilin í landinu? Sjálfstæðismaðurinn og hv. þm. Guðlaugur Þór Þórðarson óskaði eftir skýrslu frá fjármálaráðherra um einfaldara skattkerfi á síðasta ári. Þar biður hann um greiningu á áhrifum ef tekjuskattshlutfall launa yrði í einu þrepi. Þá skýrslu hvet ég hv. þingmenn til að kynna sér vel.

Það er skemmst frá því að segja að niðurstaða greiningarinnar er skýr og ótvíræð. Ef tekinn væri upp tekjuskattur einstaklinga með skatthlutfall í einu þrepi færist skattbyrðin óhjákvæmilega neðar í tekjudreifingunni þannig að þeir sem eru með lágar tekjur borga hærri skatta á meðan hinir sem eru tekjuhærri borga minna en áður, þeirra skattur lækkar. Þetta er samt markmið sjálfstæðismanna og kosningaloforð. Þar með er nokkuð ljóst fyrir hvaða heimili sá flokkur stafar. Hann er fyrir heimili þeirra efnameiri á kostnað þeirra efnaminni.