Störf þingsins.
Herra forseti. Í dag er stór dagur í sögu Íslands en líka stór dagur í sögu Evrópuráðsins þegar leiðtogar aðildarríkjanna funda hér á landi. Aðeins þrisvar sinnum frá stofnun ráðsins hafa leiðtogarnir komið saman til fundar. Evrópuráðið sjálft fundar reglulega. Nú eru fjölmargir sem gera sér ekki fulla grein fyrir tilurð Evrópuráðsins og fyrir hvað það stendur en til þess var stofnað í maí 1949 í kjölfar seinni heimsstyrjaldarinnar og eru aðildarríkin nú 46 eftir að Rússum var vísað úr Evrópuráðinu í kjölfar innrásar þeirra í Úkraínu. Meginhlutverk Evrópuráðsins er að efla samvinnu og ekki síður samkennd meðal aðildarríkjanna með höfuðáherslu á mannréttindi, lýðræðislega stjórnarhætti, mannleg gildi og almenn lífsgæði íbúa álfunnar, þar á meðal er rætt um umhverfismál, fjölmiðla, réttarkerfið, menntun og menningu og félagsleg réttindi, svo dæmi séu tekin. Samvinna Evrópuráðsríkjanna er í margs konar formi. Gerðir eru alþjóðasamningar eins og mannréttindasáttmáli Evrópu og félagsmálasáttmáli Evrópu sem ætlað er að áhrif á löggjöf aðildarríkjanna og stjórnkerfið allt. Þannig hafa þessir samningar haft afgerandi áhrif á lífsgæði okkar á Íslandi, okkar þegnanna, og verndað grundvallarréttindi okkar. Ísland er fullvalda ríki og í krafti fullveldis er það þátttakandi í viðlíka samstarfi og Evrópuráðið er. Ég tel það skipta máli að við séum einmitt virk í þessu samstarfi því við höfum mörgu að miðla. Ég ber þá von í brjósti að út af þessum fundi komi skýr skilaboð til alþjóðasamfélagsins um mikilvægi lýðræðis og mannréttinda en ekki síður til rússneskra stjórnvalda um fordæmingu á árásarstríði þeirra á Úkraínu og mögulega stríðsglæpi af þeirra hálfu.
Já, herra forseti, ég er stoltur gestgjafi og ég óska þeim (Forseti hringir.) sem halda utan um þennan risastóra viðburð góðs gengis. (Gripið fram í: Heyr, heyr.)
