Starfsemi kauphalla og skipulegra tilboðsmarkaða.
Lára Stefánsdóttir (Sf) (andsvar):
Virðulegi forseti. Ég vil í upphafi máls míns lýsa ánægju með þetta frumvarp og sérstaklega öll lög sem taka á skipulegum viðskiptum með stór hlutabréf og stór fyrirtæki.
Hér er ritað, með leyfi forseta:
„Jafnframt er fjárfestum veitt grundvallarvernd sem felst m.a. í jafnræði þeirra til að fá upplýsingar og að komið sé í veg fyrir markaðssvik, þ.e. innherjasvik og markaðsmisnotkun. Ætla má að markaðstorg stuðli þannig að aukinni skilvirkni á fjármálamarkaði.“
Nú vil ég áður en ég spyr spurningarinnar taka skýrt fram að í máli mínu er ekki verið að vísa í neina umræðu undanfarinna daga en mig langar til að spyrja hæstv. ráðherra hvort hún hyggist setja svipuð lög um sölu hlutabréfa í eigu ríkisins í fyrirtækjum.