búvörulög o.fl.
Virðulegi forseti. Ég þakka spurninguna. Menn eru alltaf að þakka hér fyrir spurningar og svör. Ég ætla bara að segja að ég tel að hver sú þjóð sem leggur tolla á innfluttar vörur í sínu landi rýri lífskjör þegna sinna fyrst og síðast. Það að tollar séu í öðrum löndum kemur málinu nákvæmlega ekkert við. Það er til svolítið sem heitir hlutfallslegir yfirburðir í framleiðslu. Ef eitt land hefur hlutfallslega yfirburði þá hefur annað hlutfallslega yfirburði á öðrum sviðum. Við breytum því ekki með tollum. Við rýrum bara lífskjör. Varðandi þessa magntolla sem um er rætt þá tel ég af augljósum ástæðum, sem ég rakti í ræðu minni varðandi til dæmis hráefni til iðnaðar í ísgerð og í súkkulaðiiðnaði, að við séum fyrst og fremst að rýra þessar atvinnugreinar. Þannig að hvort ég leggst á sveif með ykkur eða hvort hv. atvinnuveganefnd vinnur sína vinnu — það er nú gjarnan þannig að þegar afstöðu mína til landbúnaðar ber á góma þá má ég mín lítils og minn stuðningur má sín enn minna. Það breytir því ekki að það sem hér hefur verið að gerast á undanförnum 70 árum hefur ekki bætt byggð í landinu. Ég segi enn og aftur: Menn skulu fara að hugsa eitthvað nýtt í þessu máli.
Svo að ég ljúki þessari umræðu minni um beingreiðslur eða þennan nýja kafla í búvörusamningnum: Samningurinn nær yfir 12 ár. Ég er ekkert viss um að við sitjum hér öll í 12 ár og við erum að binda hendur þingsins í 12 ár. Er það þingræðislega eðlilegt? Ég segi nei.