málefni aldraðra.
Virðulegi forseti. Ég verð aðeins að fá að leiðrétta hv. þingmann af því að málefni aldraðra, og framkvæmdastjóra aldraðra, voru flutt frá heilbrigðisráðuneyti yfir til félagsmálaráðuneytisins um áramótin þarsíðustu — (Gripið fram í: þarsíðustu.) ekki um síðustu áramót, þannig að það var á valdi félagsmálaráðherra að koma þessu fram. Ég ætlaði reyndar að spyrja hv. þingmann um frumvarpið því að það kemur fram á mjög óvenjulegum tíma. Yfirleitt er þetta lagt fram í tengslum við fjárlögin eins og fram kom í máli hv. þingmanns en kemur núna seint á vorþingi. Í sjálfu sér kemur það ekki að sök þar sem gjaldið kemur inn á álagningarskrána fyrir þetta ár þannig að enginn skaði er skeður. Það kom mér mjög á óvart að frumvarpið skyldi ekki koma fram í haust, ekki það að ég hafi sérstaklega verið að leita eftir því en það hefur venjulega komið fram á haustin en ekki á vorin.
Mig langaði í framhaldi af því að spyrja hv. þingmann, vegna þess að yfirleitt þegar þetta mál hefur verið til umræðu, á hverju ári, hefur verið rætt um réttmæti nefskatts. Nefskattur eins og þessi er sem sagt ákveðin upphæð hvers gjaldanda burt séð frá tekjum, hann leggst misþungt á fólk og hefur verið talinn óréttmætur skattur. Meðal annars hefur hæstv. félagsmálaráðherra, sem núna leggur þetta frumvarp fram, hæstv. ráðherra Ásta Ragnheiður Jóhannesdóttir, margoft látið hafa eftir sér í ræðum, einmitt um sambærilegt frumvarp, að þetta væri mjög óréttlátur skattur. Þá langaði mig til þess að spyrja hv. þingmann hver hans skoðun sé á þessum skatti sem nefskatti.