ákvörðun EES-nefndarinnar nr. 269/2014 um breytingu á II. viðauka við EES-samninginn.
Herra forseti. Ég geri hér grein fyrir nefndaráliti utanríkismálanefndar vegna staðfestingar þingsályktunartillögu um staðfestingu ákvörðunar sameiginlegu EES-nefndarinnar um breytingu á II. viðauka EES-samningsins þar sem fjallað er um tæknilegar reglugerðir, staðla, prófanir og vottun. Hér eru undir reglur um markaðsetningu og notkun forefna sprengiefna. Sex mánaða frestur samkvæmt EES-samningnum til að aflétta stjórnskipulegum fyrirvara var veittur til 12. júní 2015.
Nefndin hefur fjallað um málið og er gerð grein fyrir þeirri umfjöllun í inngangi nefndarálits en um efni tillögunnar er það að segja, eins og kemur fram í nefndarálitinu, að með tilskipuninni er stefnt að því að takmarka aðgengi almennings að efnum og efnablöndum sem nota má til að framleiða ólögleg sprengiefni og tryggja tilkynningar á grunsamlegum viðskiptum með tiltekin efni. Gerðin mælir því fyrir um samræmdar reglur um aðgengi, markaðssetningu, umráð og notkun tiltekinna efna.
Ólögleg framleiðsla er gerð erfiðari með því að mæla fyrir um leyfileg styrkleikamörk fyrir tiltekin forefni sprengiefna og fjallað um að aðgengi almennings að efnum yfir þeim styrkleikamörkum skuli takmarkað, en ef ríki velji að gera þau aðgengileg almenningi verði þau að vera leyfisskyld og skráð í sérstakan gagnagrunn.
Í viðauka er listi yfir átta efni sem nauðsynleg eru í ýmiss konar hefðbundna framleiðslu. Aðgengi að þeim er ekki takmarkað að öðru leyti en því að skylt er að tilkynna um grunsamleg viðskipti, svo sem ef viðskiptavinur er óskýr að því er varðar fyrirhugaða notkun, hyggst kaupa efni í óvenjulega miklu magni, óvenjulegum styrkleika eða óvenjulegri samsetningu.
Í umfjöllun nefndarinnar kom fram að innleiðing gerðarinnar kalli á breytingar á vopnalögum, nr. 16/1998, og er gert ráð fyrir að frumvarp þess efnis verði lagt fram á haustþingi. Þá kom fram að í gerðinni er að finna ákvæði um vernd persónuupplýsinga vegna tilkynninga um viðskipti, sem mikilvægt er að taka tillit til við innleiðingu gerðarinnar. Ekki er gert ráð fyrir að gerðin hafi mikil áhrif hér á landi enda lítil þörf á umræddum efnum fyrir almenning. Þess vegna leggur utanríkismálanefnd til að tillagan verði samþykkt óbreytt.
Undir nefndarálit rita auk þess sem hér stendur hv. þingmenn Vilhjálmur Bjarnason, Ásmundur Einar Daðason, Elín Hirst, Frosti Sigurjónsson, Katrín Jakobsdóttir og Óttarr Proppé. Silja Dögg Gunnarsdóttir og Össur Skarphéðinsson voru fjarverandi við afgreiðslu málsins.
