skýrsla forsætisráðherra um efnahagsmál.

Virðulegi forseti. Ég verð að taka undir með hv. þm. Bjarna Harðarsyni að mér fundust ræður hv. þm. Árna Páls Árnasonar vera þess eðlis að maður vissi ekki alveg í upphafi hvernig endirinn mundi verða. Í upphafi talað um eitt og ræðunni var lokið með öðrum hætti.

Eitt af því sem hv. þm. Árni Páll nefndi í ræðu sinni var að það væri mikilvægt að gefa ekki eldsmat fyrir verðbólguna og talaði þá um að gefa yrði fyrirheit um stöðugleika. Þá spyr ég: Hvaða fyrirheit hefur ríkisstjórnin gefið um stöðugleika? Hvaða fyrirheit sér þingmaðurinn fram á að ríkisstjórnin muni gefa um stöðugleika? Var eitthvað í máli helstu forustumanna ríkisstjórnarinnar, forsætisráðherra eða utanríkisráðherra, sem gaf fyrirheit um stöðugleika? Var talað um eða minnst á með hvaða hætti lægra verðbólgustigi yrði náð, með hvaða hætti við gætum afnumið verðtryggingu lána og skapað fjölskyldunum í landinu sambærileg lánakjör og gerist annars staðar í okkar heimshluta? Var einhvers staðar talað um með hvaða hætti yrði um að ræða viðunandi vexti fyrir atvinnulífið í landinu? Var einhvers staðar talað um með hvaða hætti atvinnustigið yrði tryggt?

Þetta eru allt saman atriði sem skipta máli ef gefa á fyrirheit um stöðugleika. Ég hlýt að spyrja að gefnu tilefni: Fyrst það er að mati þingmannsins mikilvægasti hluturinn að ríkisstjórnin gefi fyrirheit um stöðugleika — og ég gat ekki skilið þingmanninn öðruvísi en að ríkisstjórnin hefði gefið slík fyrirheit — hvar er slík fyrirheit að finna og hvað er það í aðgerðum ríkisstjórnarinnar sem bendir til þess að um verði að ræða stöðugleika í íslensku þjóðlífi og efnahagskerfi á næstunni?