áætlun um meðferð og ráðstöfun aflamagns sem dregið er frá heildarafla.
Virðulegi forseti. Ég þakka hv. þingmanni fyrir ræðu sína. Mig langar aðeins að halda áfram að ræða strandveiðar. Þær hafa verið mikið í umræðunni og menn viðrað ýmsar útfærslur í þeim efnum, sem ég tel mjög gott og gott innlegg í vinnu atvinnuveganefndar að skoða hvort dagar geti komið til móts við gagnrýni strandveiðisjómanna eða það að menn tilkynni sig við upphaf veiðidags, þeir fari ekki á sjó vegna veðurs og eigi þá inni dag. Þetta allt finnst mér mega skoða.
Skipting milli hólfa hefur líka verið gagnrýnd, að það magn sem er í hverju hólfi og fjöldi báta í hverju hólfi sé ekki nægjanlega sanngjarnt. Mig langar að heyra viðhorf hv. þingmanns gagnvart því, hvort hann telur að eitthvert samspil eigi að vera á milli þess aflamagns sem er í hverju hólfi og fjölda báta, hvort það eigi til dæmis að vera ákveðinn grunnur í öllum hólfum en síðan viðbót og tekið tillit til þess hversu margir bátar eru í hverju hólfi. Í lok strandveiðitímabilsins í ágúst er svo hægt að deila þannig að menn brenni ekki inni með afla sem er ætlaður til strandveiða, hægt væri að deila því inn á hólfin til að allir gætu nýtt sér það. Telur hv. þingmaður að það ætti að vera einhver lágmarksgrunnur en svo tæki rest mið af því hversu margir bátar væru í hverju hólfi?