frumvörp um skipulagsmál og mannvirki.
Virðulegi forseti. Síðastliðið vor lagði hæstv. umhverfisráðherra fram þrjú frumvörp. Frumvarp til laga um mannvirki, frumvarp til laga um brunavarnir og síðast en ekki síst frumvarp að nýjum skipulagslögum. Í skipulagsfrumvarpinu voru afar slæmar hugmyndir um svokallað landsskipulag. En þar er ríkinu í raun veitt fullt forræði að ákveða hvernig einstök sveitarfélög haga skipulagsmálum sínum. Þar segir, með leyfi forseta:
„Landsskipulagsáætlun sem felur í sér stefnu um landnotkun er bindandi við gerð skipulags samkvæmt lögum þessum og skulu sveitarfélög endurskoða staðfest skipulag sitt í samræmi við áætlunina við næstu endurskoðun aðalskipulags sveitarfélagsins en þó eigi síðar en innan fjögurra ára frá samþykkt hennar.“
Í stuttu máli sagt hafa þessar hugmyndir fallið í afar grýttan jarðveg hjá sveitarfélögum landsins sem og þeirra sem hafna algerlega þeirri forræðishyggju sem landsskipulagið felur í sér. Við framsóknarmenn höfnum því einnig en teljum að ríkið ætti að samhæfa áætlanir sínar og koma þeim á framfæri við sveitarfélögin á einum stað til að einfalda skipulagsvinnu sveitarfélaganna. Þetta er allt annað en kemur fram í frumvarpi til skipulagslaga.
Nú hefur það gerst að frumvörpin þrjú hafa verið send aftur upp í ráðuneyti til gagngerrar endurskoðunar og það þrátt fyrir að hafa fengið algjöra sérmeðferð í umhverfisnefnd. En nú er stóra spurningin: Ætlar umhverfisráðherra að falla frá hugmyndum um forræðishyggjuna í landsskipulaginu eins og þær lágu fyrir í frumvarpinu eða munum við sjá aðra og breytta tillögu um landsskipulag? Og einnig: Ætlar umhverfisráðherra að leggja fram að nýju frumvarp til laga um mannvirki og brunavarnir því að beðið er með óþreyju eftir betri og skýrari lagaframkvæmd á þessum sviðum sem og í skipulagsmálum?