Störf þingsins.

Virðulegur forseti. Það er sorglegt að skoða framlög til Heilbrigðisstofnunar Suðurnesja. Það er ekki hægt að lesa neitt annað út úr því en að ólin sé svo hert að það bitni verulega á íbúum svæðisins og hafi gert um langt árabil. Samantekt Deloitte staðfestir þetta. Þegar fjárveitingar til Heilbrigðisstofnunar Suðurnesja eru skoðaðar kemur í ljós að þær hafa hækkað um 10% frá árinu 2008–2022. Séu þessi framlög hins vegar skoðuð miðað við fjölda íbúa kemur í ljós að framlögin hafa lækkað um 22%. Fjárveitingar vegna sjúkrasviðs, sem sinnir m.a. slysa- og bráðaþjónustu, hafa lækkað talsvert á tímabilinu 2008–2022. Lækkunin nemur 23% þegar framlög á hvern íbúa eru skoðuð en lækkunin er heil 45%. Á tímabilinu hefur íbúum á Íslandi fjölgað um 17% en á sama tíma hefur íbúum Suðurnesja fjölgað um 36,6%.

Þá er einnig rétt að minnast á að kröfur til heilbrigðisstofnana hafa aukist mikið, m.a. með stofnun geðheilbrigðisteyma. Það gefur því augaleið að möguleikar stofnunarinnar til að veita þá þjónustu sem veita þarf hafa verið skertir verulega og í raun miklu meira en kemur fram í þessum tölum. Það er ekki eins og svigrúm stofnunarinnar sé mikið til þess að auka þjónustuna. Launavísitala opinberra starfsmanna hefur hækkað um 129% og launakostnaður nemur samkvæmt samantektinni 88% af heildarútgjöldum Heilbrigðisstofnunar Suðurnesja. Þessar tölur draga upp skýra en jafnframt afar dökka mynd.

Virðulegi forseti. Það er bersýnilega ekki til hagsbóta fyrir nokkurt samfélag að viðhalda slíkri sveltistefnu í heilbrigðisþjónustu (Forseti hringir.) og íbúar Suðurnesja eiga betra skilið. Því krefst ég þess að þetta verði leiðrétt í fjárlögum ársins 2023.