forvarnir og lýðheilsa þegar horft er til aukins aðgengis að áfengi.

Hæstv. forseti. Ég vil þakka þessa umræðu og hv. þm. Jódísi Skúladóttur málshefjanda. Ég tek með mér úr þessari umræðu, sem kemur mér ekki á óvart, að það standa allir hv. þingmenn sem hér hafa talað — og auðvitað vísaði ég til þess að allir hv. þingmenn hefðu greitt atkvæði með lýðheilsustefnu hér í júní 2021 sem gildir til 2030 þannig að við stöndum öll með lýðheilsunni. En það eru eðlilega ólík sjónarmið um nálgun og leiðir og það er að finna í hæstv. ríkisstjórn, eins og hér hefur komið fram, og í flokkum jafnvel eins og í þessari umræðu. Við hins vegar stöndum á ákveðnum tímamótum og við getum alveg kallað það lýðheilsuógn þegar við sjáum netsölu aukast í slíkum mæli og þegar ein stærsta verslunarkeðja þjóðarinnar hefur lýst því yfir að hún ætli að opna netsölu þá verðum við auðvitað að láta reyna á lögin og ég tek undir með hv. þingmönnum sem komu inn á lagaumhverfið hér. Þess vegna sá ég tilefni til að senda erindi á hæstv. fjármála- og efnahagsráðherra sem fer með rekstur Áfengis- og tóbaksverslunar ríkisins sem starfar eftir lögum og fer með þessa einkasölu, sem er mikilvægt fyrirkomulag. Við erum hvött til af öllum, öllum heilbrigðisstéttum, alþjóðasamtökum, heilbrigðisyfirvöldum að halda í það fyrirkomulag vegna þess að í því er forvörn út af fyrir sig. Út frá því lagaumhverfi sem við höfum sett, út frá lýðheilsustefnunni sem við höfum öll samþykkt hér á Alþingi er algerlega nauðsynlegt, hæstv. forseti, að við látum reyna á lögmæti netsölu og ákveðum í hvaða átt við viljum fara með lýðheilsu þjóðarinnar.