rannsókn á athöfnum þingmanna í tengslum við búsáhaldabyltinguna í janúar 2009.

Forseti. Það gætir ákveðins misskilnings hjá hv. þm. Jóni Gunnarssyni þegar hann hélt því fram áðan að við værum og ég m.a. að gera athugasemdir við hvaða þingmál Framsóknarflokkurinn flytti á þingi. Það hef ég aldrei gert. Ég hef hins vegar spurt hvers vegna þessi forgangsröðun sé, því að samkvæmt vef Alþingis eru þingmenn Framsóknarflokksins eða flokkurinn í heild með 21 þingsályktunartillögu í gangi á þinginu. Það er 21 þingsályktunartillaga samkvæmt vef þingsins og framsóknarþingmenn eru merktir á 32 lagafrumvörpum sem eru í einum eða öðrum farvegi, þetta eru 53 mál. Hv. þingmenn Framsóknarflokksins hafa væntanlega sest, eins og ég sagði áðan, yfir málalistann í gær, plokkað þetta út og fundið forgangsmálið sem er það sem við ræðum hér í dag. Það var þetta sem ég átti við. En ég vil spyrja hv. þm. Jón Gunnarsson: Telur hann að í tillögu framsóknarmanna sé átt við þann þingmann sem hv. þm. Jón Gunnarsson nefndi hvað oftast áðan, Álfheiði Ingadóttur?