utanríkis- og alþjóðamál.

Frú forseti. Varðandi fyrri spurninguna sem laut að Kína þá hafa verið uppstyttur í þeim viðræðum m.a. vegna nokkuð eindreginna viðhorfa Kína um frjálsa för vinnuafls sem við höfum goldið varhuga við. Sömuleiðis hefur ekki náðst fram það sem við höfum viljað varðandi fisk. Nú er hugsanlegt að hvort tveggja liðkist í sumar.

Varðandi Evrópusambandið þá hefur auðvitað orðið gjörbreyting á Evrópusambandinu frá þeim tíma þegar við gengum inn og ég veit að hv. þingmaður veit það. Á þeim tíma var uppruni tilskipana fyrst og fremst mjög nálægt framkvæmdastjórninni þar sem við höfðum tækifæri og höfum enn tækifæri til að hafa áhrif á mótun.

Það sem hefur breyst er það að til að draga úr lýðræðishalla í Evrópusambandinu hefur Evrópuþingið fengið gríðarlegt vægi, snýr oft við því sem kemur frá ráðinu og framkvæmdastjórninni. Þar höfum við engin tækifæri til að hafa áhrif á. Ég óttast að það geti verið erfitt í framtíðinni. Þess vegna hef ég hef lagt áherslu á að þingið komi sér upp fulltrúa eða skrifstofu hjá Evrópuþinginu til að geta haft áhrif á þetta.