frumvarp um húsnæðisbætur.
Herra forseti. Nú er myndin tekin að skýrast og frumvörp til laga um stöðugleikaskatt og fjármálafyrirtæki vegna nauðungarsamninga loks að koma fram og hafa fengið víðtæka kynningu, samanber fundinn í hádeginu. Þetta er kannski stóra málið sem við erum öll búin að bíða eftir á þessu vorþingi en samt stendur út af að ég hafði skilið það sem svo að við mættum líka eiga von á frumvarpi um húsnæðisbætur á þessu þingi. Það er því kannski eina stóra málið sem þingið er að bíða eftir og mögulega síðasta púslið í því hvernig þinglokum verður háttað.
Mig langar í ljósi þessa að spyrja hæstv. félags- og húsnæðismálaráðherra hvort von sé á þessu frumvarpi á þessu þingi. Nú er kominn 8. júní þannig að tíminn sem við höfum hérna er farinn að styttast. Ég spyr: Eigum við von á frumvarpi um húsnæðisbætur á þessu þingi? Hvenær sér þá hæstv. ráðherra fyrir sér að við fáum að sjá það?