heimild til að stofna opinbert hlutafélag um uppbyggingu samgönguinnviða á höfuðborgarsvæðinu.

Frú forseti. Ég mæli hér fyrir minnihlutaáliti. Í framhaldsnefndaráliti meiri hluta fjárlaganefndar eru í ýmsu tilliti lagðar fram nýjar áherslur og sjónarmið sem eru fallin til að bæta að einhverju leyti úr ágöllum frumvarpsins. Settar eru fram mikilvægar athugasemdir sem munu auka möguleika á því að beina málinu inn á heillavænlegri brautir í þágu íbúa höfuðborgarsvæðisins og annarra landsmanna. Sér í lagi vil ég fagna því að í álitinu er viðurkennt mikilvægi Sundabrautar þegar sagt er að sérstaklega verði hugað að greiðri tengingu aðliggjandi stofnbrauta, svo sem Sundabrautar, inn á stofnbrautir höfuðborgarsvæðisins.

En gagnrýnivert er, frú forseti, að þegar um er að ræða svo stóra framkvæmd sem borgarlína er skuli ekki liggja fyrir rekstraráætlun. Og framkvæmdakostnaður er mjög óljós og vís til þess að fara verulega fram úr áætlun. Áform um borgarlínu fela í sér að reka eigi á höfuðborgarsvæðinu tvöfalt og dýrt strætisvagnakerfi. Með öllu er óljóst hversu stór hluti íbúa á höfuðborgarsvæðinu muni nýta sér borgarlínu í framtíðinni í ljósi þess að kostnaðarsöm tilraun undanfarin níu ár til að fjölga strætófarþegum hefur ekki leitt af sér marktæka fjölgun þeirra sem hlutfallslega nýta sér þjónustuna.

Með áformum um borgarlínu er stefnt að því að verja gríðarlegum fjármunum til að þrengja að annarri umferð, sér í lagi fjölskyldubílnum svokallaða, sem flestir íbúar kjósa að nota. Með frumvarpinu er stefnt að því að láta þá sem í auknum mæli munu þá sitja fastir í umferðinni greiða sérstaklega fyrir það með svonefndum flýti- og umferðargjöldum. Ekkert er kveðið á um hver eigi að greiða rekstrarkostnað borgarlínu að loknum framkvæmdum sem ætla má að verði umtalsverður. Telja verður verulega hættu á því að þessi rekstrarkostnaður falli á skattgreiðendur til framtíðar.

Í ljósi ofangreindra ágalla á frumvarpinu ítrekar minni hluti, Miðflokkurinn, þá afstöðu sína að betur hefði farið á því að setja málið í annan farveg og taka tillit til athugasemda sem komu fram fyrir nefndinni eins og þær um að útfærsla málsins stangist á við lög um opinberar framkvæmdir. Miðflokkurinn og minni hluti tekur ekki undir það álit meiri hlutans um að borgarlína sé mikilvægt verkefni.