störf þingsins.
Hæstv. forseti. Nú fæ ég aftur tækifæri til að ræða samgöngukerfið sem ég viðraði hér áðan. Það er fínt því að ræðan var kannski heldur stutt. Hugmyndin að samgöngukerfi á höfuðborgarsvæðinu, og kannski líka í höfuðstað Norðurlandsins þar sem er nógu mikill fjöldi fólks, byggir eins og áður sagði á þrem tækninýjungum; rafmagnsbílum, sjálfkeyrandi bílum og leigubílakerfinu Uber. Mig langar að fara aðeins betur ofan í hvern tækniþátt fyrir sig.
Ef við byrjum á rafmagnsbílunum er slíkt þekkt og við sjáum að raunveruleg orkuskipti eru í Noregi þar sem rafmagnsbílar eru til jafns í kostnaði á við hefðbundna bíla. Ég held að það sé eitt sem við þurfum að koma á hér, að það verði ekki raunverulegt fyrr en kostnaður er jafnaður þar á milli. Fyrir þá sem þekkja ekki Uber-leigubílakerfið þá er það kerfi með rosalega mörgum bílum og biðtíminn er rosalega stuttur því að það er nánast bíll á hverju horni. Þetta er gert í gegnum snjallsímaforrit og ég sé fyrir mér slíkt kerfi hér á höfuðborgarsvæðinu eða á Norðurlandi, sem yrði þá í gegnum svipað forrit og Uber og gæti þá verið forpöntun eða pöntun á bíl svipað og leigubílum. Svo kannski að lokum það sem er ekki komið en verið er að vinna að, þ.e. sjálfkeyrandi bílar. Þar mun Sverrir Bollason skila skýrslu af sér í sumar um hvernig sjálfkeyrandi bílar munu virka með samgöngukerfinu á Íslandi. Ég held að þetta geti leyst (Forseti hringir.) mjög mörg vandamál, t.d. í ferðaþjónustu fatlaðra, dregið úr ölvunarakstri og fleira.