Varamaður tekur þingsæti.
Forseti (Birgir Ármannsson):
Borist hefur svohljóðandi bréf frá 10. þm. Reykv. s., Ágústi Ólafi Ágústssyni, dagsett 21. október:
„Þar sem ég er á förum til útlanda í opinberum erindum og get ekki sótt þingfundi á næstunni óska ég eftir því, með vísan til 2. mgr. 53. gr. þingskapa, að 2. varamaður á lista Samfylkingarinnar í Reykjavíkurkjördæmi suður, Kristrún Heimisdóttir lögfræðingur, Reykjavík, taki sæti á Alþingi á meðan, en Einar Karl Haraldsson, 1. varamaður á listanum, getur ekki tekið sæti að sinni á Alþingi.
Virðingarfyllst,
Ágúst Ólafur Ágústsson, 10. þm. Reykv. s.“
Borist hefur bréf frá 1. varaþingmanni Samfylkingarinnar í Reykjavíkurkjördæmi suður, Einari Karli Haraldssyni, dagsett 15. október 2004, þar sem segir svo:
„Vegna anna á næstunni get ég ekki tekið sæti Ágústs Ólafs Ágústssonar, 10. þm. Reykv. s., sem verður fjarverandi vegna setu á allsherjarþingi Sameinuðu þjóðanna 24. október til 7. nóvember næstkomandi.“
Kjörbréf Kristrúnar Heimisdóttur hefur þegar verið rannsakað og samþykkt en hún hefur ekki áður tekið sæti á Alþingi og ber því að undirrita drengskaparheit að stjórnarskránni.
[Kristrún Heimisdóttir, 10. þm. Reykv. s., undirritaði drengskaparheit um að halda stjórnarskrána.]