staðan í stjórnmálunum í byrjun árs og verkefnin framundan.
Herra forseti. Það er rétt hjá hæstv. fjármálaráðherra, tíminn er knappur en við reynum áfram. Staðreyndin er sú að þau fjárlög sem samþykkt voru hér fyrir áramót — og það mátti sjá í flestum umsögnum — skapa hættu á hærra vaxtastigi og sterkara gengi en ella. Það kom mjög skýrt fram í umsögnum flestra sérfræðinga. Það grefur aftur undan samkeppnisstöðu þeirra útflutningsgreina, eins og tækni- og sprotafyrirtækja, sem ég vísaði til hér áður. Staðreyndin er sú að á sama tíma og við höfum séð mikinn og kröftugan vöxt í ferðaþjónustu er engan útflutningsvöxt að ráði að finna hjá tækni- og sprotafyrirtækjum, hvort heldur sem er í þjónustuliðnum eða vöruútflutningi. Það er napurleg staðreynd sem við höfum horft upp á á undanförnum fjórum árum og áfram virðist eiga að stuðla að því sama.
Í tíð fyrri ríkisstjórnar var þetta töluvert áhyggjuefni og horft t.d. til einföldunar á virðisaukaskattskerfi og tilfærslu ferðaþjónustu upp í efra þrep sem efnahagsaðgerðar en ekki skattaaðgerðar, þ.e. að allur almenningur gæti notið góðs af lægri virðisaukaskatti (Forseti hringir.) en ella meðan samkeppnisstaða ferðaþjónustunnar væri jöfnuð í ljósi þess að hún virtist þrengja mjög að öðrum útflutningsgreinum sem ekki hafa vaxið á sama tíma. Það er þess vegna sem ég velti þessu fyrir mér.