afgreiðsla frumvarps um stjórn fiskveiða.
Virðulegi forseti. Engar deilur eru um það, held ég, ef menn skoða málið af raunsæi að meðferð þessa máls er algjörlega fyrir neðan allar hellur og ekki til eftirbreytni í öðrum málum. Umsagnaraðilar þurfa að skila inn umsögnum með eins til tveggja daga fyrirvara og allar umsagnir eru neikvæðar en samt á að keyra málið í gegn á þinginu.
Ég vil beina því til hæstv. forseta að taka það sérstaklega upp í forsætisnefnd hvernig hv. þingmenn mæta á þingfundi og nefndarfundi sem að mínu mati er algjörlega til skammar. Hér sjást sumir ekki dögum og vikum saman. Það er til skammar. Í gærmorgun var fundur í fjárlaganefnd. Þar mættu fulltrúar Seðlabankans, fulltrúar fjármálaráðuneytisins, fulltrúar efnahags- og viðskiptaráðuneytisins til að ræða erlenda skuldastöðu þjóðarbúsins. Þegar mætt var á fundinn vissu þeir fulltrúar ekki um hvað ætti að ræða á fundinum. Þetta eru vinnubrögð sem eru til háborinnar skammar. Ég hvet hæstv. forseta til að taka þetta upp (Forseti hringir.) í forsætisnefnd.