viðræður við kröfuhafa og afnám gjaldeyrishafta.

Virðulegur forseti. Ég var reyndar að vonast til að fá þessa spurningu í síðasta fyrirspurnatíma en hv. þingmaður var ekki á staðnum þá og þess vegna varð þessi bið. En það er mjög gott að fá þessa spurningu til að geta áréttað að ríkisstjórnin á ekki í viðræðum við kröfuhafa eins og ég hef sagt bæði fréttamanni Reuters og öðrum fréttamönnum sem ég hef talað við, erlendum og innlendum, undanfarnar vikur og mánuði. Hv. þingmaður getur farið í gegnum fréttasafnið til að fullvissa sig um það.

Það er hins vegar rétt hjá hv. þingmanni að í fréttinni var því haldið fram, eða það virðist vera viðvarandi misskilningur víða erlendis eftir undangengin ár, að íslensk stjórnvöld eigi í viðræðum við kröfuhafa og um sé að ræða skuldir íslenska ríkisins. Það virðist með öðrum orðum hafa gleymst að koma því á framfæri undanfarin fjögur ár að hér er ekki um að ræða skuldir íslenska ríkisins, ekki frekar en í deilunni um Icesave. En þessi misskilningur virðist enn viðvarandi víða erlendis en ég, eins og ég gat um, nota hvert tækifæri til að reyna að eyða honum.

Hvað varðar framgang þessara mála hef ég lýst því yfir að þau geti leyst tiltölulega hratt á fáeinum mánuðum ef menn komast að sameiginlegri niðurstöðu um hvað sé ásættanlegt, þ.e. hvað leyfi afnám hafta, og þannig raunar svarað spurningunni nákvæmlega á sama hátt og hæstv. fjármálaráðherra: Allt veltur þetta á því að kröfuhafar þrotabúanna búi til þær aðstæður að þær leyfi stjórnvöldum að aflétta höftunum.

Það er hins vegar annað mál að líklega hefur verið búið allt of vel að kröfuhöfum föllnu bankanna á undanförnum árum á Íslandi. Íslensk stjórnvöld virðast hafa gert ráð fyrir því að þetta mál mundi leysast á tiltölulega skömmum tíma en við sjáum hins vegar að það hefur núna varað í nokkur ár og getur ekki talist eðlilegt að viðhalda því fyrirkomulagi sem (Forseti hringir.) síðasta ríkisstjórn kom á.