atvinnuleysistryggingar og réttarstaða starfsmanna við aðilaskipti að fyrirtækjum.
Hæstv. forseti. Ég þakka hæstv. ráðherra fyrir þessi svör. Ég þarf þá einfaldlega að kanna það betur hjá þeim aðilum sem hafa leitað til mín varðandi þessa heimild í lögunum um atvinnuleysisbæturnar, hvort erindi þeirra hafi ekki skilað sér alla leið. En þar er um að ræða aðila í matvælaframleiðslu sem lenda í því að hráefnisskortur verður til þess að stöðva þurfi starfsemi og þess vegna séu starfsmenn ráðnir inn til skamms tíma í senn en ekki í fulla fasta stöðu. Þannig hófst sú umræða og ég taldi að hún væri komin inn í ráðuneytið.
Að öðru leyti vil ég einfaldlega hvetja hæstv. ráðherra til dáða í því að afla upplýsinga til að greiða fyrir því að endurskoðun og yfirferð yfir hugmyndafræðina varðandi hlutaatvinnuleysisbæturnar gleymist ekki við þessar miklu breytingar sem verða á nefndakerfi þingsins og ég vonast svo sannarlega til þess að sú vinna muni skila árangri.