verndar- og nýtingaráætlun vegna virkjunar fallvatna og jarðhita.
Hæstv. forseti. Nú hefur hæstv. ráðherra misskilið mig allhrapallega ef hæstv. ráðherra telur að ég telji það tilraun til íhlutunar að ráðherra leggi fram lagafrumvarp. Það lá ekki í orðum mínum. Það sem ég vísaði til var tilraunin til íhlutunar í störf verkefnisstjórnar um rammaáætlun sem unnið hefur samkvæmt erindisbréfi í mörg ár að skila af sér niðurstöðum. Okkur greinir á um það hvort ráðherra eigi að krukka í vinnu verkefnisstjórnar meðan hún stendur yfir eða ekki. Að sjálfsögðu fer ráðherra með valdið að geta lagt fram lagafrumvarp. Um það er enginn ágreiningur okkar í milli.
Hins vegar vil ég minna á, af því að vísað var til skýrslu rannsóknarnefndar Alþingis og niðurstöðu þingmannanefndarinnar út af henni, að við sem vorum í nefndinni lögðum þunga áherslu á að þingið ætti að vera sjálfstæðara í vinnubrögðum sínum og leyfa sér að taka mál og kryfja þau til mergjar og breyta þeim eins og við höfum gert, sérstaklega í félagsmálanefnd. Ég vonast til að ráðherrann sýni sjónarmiði mínu skilning að í þessu máli á þingið ekki að vera feimið við að koma fram með sínar breytingar vegna þess að málið er gríðarlega mikilvægt.
Auðvitað er náttúruverndaráætlun í gildi og við könnumst báðar, bæði ég og hæstv. ráðherra, við umræðuna sem átti sér stað í þinginu þar sem ég ásamt fleirum mótmæltum vinnulagi hæstv. umhverfisráðherra. Við verðum seint sammála um alla hluti enda er það ljóst að við erum ekki í sama stjórnmálaflokki og áherslur okkar eru gerólíkar í þessum málum.