fjármálastefna 2017--2022.
Herra forseti. Það væri auðvitað hægt að fara í skatt- og gjaldabreytingar til þess að afgangurinn væri meiri og svigrúmið meira einmitt þegar við erum á þessum stað í hagsveiflunni.
Það er talað um hættumerki hérna vegna gjaldmiðilsins, vegna styrkingar krónunnar, vegna áhrifa ferðaþjónustunnar á þessa hluti. Við vitum að ósjálfbær vöxtur ferðaþjónustunnar hefur líka áhrif á húsnæðismarkað o.s.frv. Þetta er nefnt í stefnunni.
Ég vil spyrja hæstv. ráðherra hvort hann muni beita sér fyrir því að tekið verði á þessum vanda, að þau tæki sem við búum yfir, eins og t.d. hækkun skatta eða lækkun skatta eða hvatar sem við getum beitt út í atvinnulífið og til að reyna að stýra þróun sem þar er, verði notuð til að slá á þau hættumerki sem lýst er í greinargerð með stefnunni.