beiðni um umræðu um afnám verðtryggingar.
Virðulegi forseti. Ég vil nú segja það sem nýliði hér að ég er miklu ánægðari með þingstörfin og fundarstjórn hæstv. forseta en ég átti von á þegar ég kom inn á þing. Hér er yfirleitt gott að eiga samtal við þingmenn úr öllum flokkum og allir taka manni vel. Það hefur komið mér á óvart því orðspor Alþingis hefur því miður ekki verið nógu gott út á við en það á ekki við rök að styðjast. Ég segi það bara hér. En það eru einstöku mál sem skera sig úr. Ég verð að segja að hæstv. forseti á samúð mína í þessu máli, að forsætisráðherra skuli með þessum hætti víkja sér mánuð eftir mánuð undan því sem hann sjálfur gerði margoft kröfu um til annarra ráðherra þegar önnur ríkisstjórn var á síðasta kjörtímabili. Ég vil hvetja til þess að þessu linni og forsætisráðherra sjái sóma sinn í að koma hér og taka þessa umræðu.