ríkisábyrgð á lántöku Tryggingarsjóðs innstæðueigenda og fjárfesta.

Frú forseti. Ég þakka hv. þingmanni fyrir svarið. Það hefur náttúrlega mikið verið talað um málsmeðferð stjórnsýslunnar, gagnsæ vinnubrögð o.s.frv. frá því að við tvær komum ásamt fleirum inn á þing eftir síðustu kosningar. Þegar maður horfir á heildarmyndina væri gott að fá skoðun þingmannsins á því hvernig tekist hafi til að hennar mati við að koma þessum fyrirheitum í verk í þinginu varðandi gagnsæi og þessi stórauknu lýðræðislegu vinnubrögð sem fjölmargir þingmenn hafa talað um og veifað úr ræðustól og á tyllidögum. Fjárlaganefnd óskaði t.d. eftir áliti frá efnahags- og skattanefnd í þessu máli og fjögur minnihlutaálit komu út úr nefndinni sem ekkert var gert með í fjárlaganefnd. Mér finnst þetta dæmi um ákveðna brotalöm í vinnubrögðum þingnefnda og mig langar að leita eftir því hvort hv. þingmaður sé sammála mér um það.